Zil Hajj Ke 10 Behtareen Amal
Assalamu Alaikum Wa Rahmatullahi Wa Barakatuhu! Mere Azeez Bhaiyo'n aur Behno'n umeed hai ke aap sab khairiyat se honge. Iss blog post ke zariye se aap sab jo topic jaan'ne wale hai woh hai "Zil Hajj ke 10 Behtareen Amal". Aap hazraat se adaban guzarish hai ke iss post ko poora padhne ki koshish karein taake ilm e deen ka sabaq haasil ho aur topic ki jaankari ho. Allah Azzuwajal hum sab ko samajhne ki toufeeq ata farmaaye (Ameen)
Hajj Aur Umrah
Sabse behtareen amal woh hai jo Zil Hajj ke mahine mein Hajj O Umrah ki zirayat kare. Aur saaf niyyat se kiya gaya Hajj ka sawab Jannat hai.
Hadees E Mubarak:
Rasool E Waqar Sallallahu Alaihi Wasallam ne farmaya "Umrah gunaho'n ka kaffara hai! Iske aur pichle saal ke darmiyaan aur ek qabooliyat waale Hajj ka sawab jannat se kam nahi hai".
(Sahih Al-Bukhaari:1773)
Roza Rakhna
Allah Ta'ala ke nazdeek Roza sabse pasandida amal hai aur khaas karke 10 mein se 9 din ke Roze ki fazeelat bahot zyada hai.
Hadees E Mubarak:
Aaqa E Naamdaar Madine Ke Tajdaar ham sab ke Rehbar Sallallahu Alaihi Wasallam ne farmaya "Jisne Arafah ke din Roza rakha toh uske ek saal ke agle aur ek saal pichle ke gunah baksh diye jaayenge".
(Sunan Ibn Majah:173, Sahih)
Zikr Karna
Zil Hajj ke pehle 10 din Masjid mein ya ghar mein ya aisi pakeeza jagah jahan Allah Ta'ala ke zikr karne ki ijazat hai waha'n ibadat ke taur par zikr karein.
Hadees E Mubarak:
Aaqa E Do Jaha'n Khatmul Mursaleen Sallallahu Alaihi Wasallam ne farmaya "Inn dino (zil hajj ke 10 din) ke neik amal Allah Ta'ala ko tamaam dino ke neik aamal se mehboob hai".
Toh iss douraan zyada se zyada Allah Ta'ala ka zikr karein!
Aur sabse behtareen zikr inn dino (yaani zil hajj ke 10 din) mein karna hai woh ye hai.
- Tehleel (Laa Ilaha Ill'allah)
- Takbeer (Allahu Akbar)
- Tahmeed (Alhamdullillah)
(Musnad E Ahmed:5446 Sahih)
Neik Amal
Allah Subhanahu Ta'ala ko neik amaal sabse zyada pasand hai! Uske badle bahot nekiya'n ata hoti hai, jo log Hajj par jaane ki taaqat nahi rakhte woh iss waqt Allah Ta'ala ki Ibadat karein, Dua karein, Qur'an padhein, Sadaqah Karein, Apni Waalidain ki khidmat karein, Rishtedaaro'n ko Barkarar Rakhe, Acchayi ka kaam karein!
Insaan jab apne aapko neik kaamo'n mein dilchaspi leta hai toh uska tann aur mann bhi saaf hone lagta hai, uske khayalat, uska satar sab ke sab saaf hone lagte hai aur woh jab tak neik kaam karta rahega uski soch mein burey khayalat ka galba dur hota chala jaayega. Isliye har roz ki zindagi mein ye aam karlo ke apni zindagi ko acchi banane ke liye neik aamal karunga! Khaas kar inn 10 dino'n mein neik aamal karein kyunke iska sawab aam dino se inn dino mein bahot hai.
Touba Karna
Inn 10 dino'n mein sab se ahem kaam Allah Ta'ala se sacche dil se Touba karna hai. Touba ka matlab hai ke Allah Ta'ala ke taraf lautna, apne saare gunah jo akele ya logo'n mein huye ya jo cheez galti se huyi ho jo Allah Ta'ala ko na-pasand karti ho unn sab ke liye Allah se mu'aafi maangna. Jo gunah kar chuke hai uss gunah mein dobara na lautna aur uske badle mein neik aamaal karna, inn 10 dino mein khaas kar khayal rakha jaaye.
Qurbani Ada Karna
Sabse pasandida amal jo Allah Subhanahu Ta'ala ke aur kareeb karde woh hai Qurbani. Apne sabse behtareen jaanwar ko Allah Azzuwajal ke liye qurbaan karna.
Hadees E Mubarak:
Anas Bin Malik RadiAllahu Anhu Farmate hai "Rasool Allah Sallallahu Alaihi Wasallam ne do seengh (horn) waala kaala (black) aur safaid (white) dumba qurbaani ki, aap sallallahu aliaihi wasallam Allah ka naam lete aur uski badaayi bayan karte, Maine unhe dono haatho'n se qurbani karte dekha aur unke pair ko unke (dumbe) patho par rakhta dekha".
(Sunan Ibn Majah:3120 Sahih)
Toh mere azeezo'n umeed hai ke aap sab ko iss post ka topic samajh mein aaya hoga. In Sha Allah agar zindagi baaki rahi toh mai aapke saamne agla post lekar aap ke khidmat pesh hounga. Agar aap ko ye post ke zariye se zara si bhi jaankaari haasil huyi ho toh isko apne dost aur naujawan sathiyo'n mein share zaroor karein taake unhe bhi deen ka kuch ilm ho. Allah Ta'ala se dua hai ke hum sab ko Deen E Islam ke khatir khair ke darwaze khol de (Ameen)
Jazakallahu Khair
Comments